Democracy & Peace Award ကို ကိုယ်စားလက်ခံရယူခဲ့သူတဦးနှင့်တွေ့ဆုံခြင်း

ဇွန်လ(၁၉)ရက်နေ့တွင်ကျရောက်ခံသည့်လူထုခေါင်းဆောင်ဒေါ်အောင်ဆန်းစုကြည်ကို မြန်မာ့ဒီမိုကရေစီအရေးကို ကူညီအားပေးတဲ့အနေနဲ့ ဂျပန်လွှတ်တော်အမတ်များသမဂ္ဂမှ ပေးအပ်ချီးမြင့်သည့် ဒီမိုကရေစီနှင့် ငြိမ်းချမ်းရေးဆုကို ဂျပန်လွှတ်တော်အဆောက်အဦတွင် ကိုယ်စားသွားရောက်ယူခဲ့ကြသည့် သူများထဲမှ တဦးအပါအ၀င်ဖြစ်သည့် NLD(LA-Japan)၏ အတွင်းရေးမှူး ဦးသောင်းမြင့်ဦးနှင့် မိုးသောက်ကြယ်မှ သွားရောက်တွေ့ဆုံခဲ့ပါသည်။

NLD(LA-JB)၏တာဝန်ခံများ(၀ဲမှယာ) ဦးသန့်ဇင်ဦး၊ ဦးလင်းအောင်၊ ဦးသောင်းမြင့်ဦး၊ ဦးသာဇော်မောင်မောင်၊ ဦးဇော်မင်းထွန်း၊ ဦးလှဟန်

မေး-ဒီဆုကို ဘယ်လိုရည်ရွယ်ချက်နဲ့ပေးတယ်လို့ထင်ပါသလဲ?

ဖြေ-ဒီဆုကိုပေးတဲ့ရည်ရွယ်ချက်က တစ်အချက်အနေနဲ့ ဂျပန်မှာရှိနေတဲ့ ဂျပန်နိုင်ငံရေးကို ဦးဆောင်နေတဲ့ လွတ်တော်အမတ်များကနေ ပြီးတော့ မြန်မာ့ဒီမိုကရေစီအရေးကို ကူညီအားပေးတဲ့အနေနဲ့ ဂျပန်လွှတ်တော်အမတ်များသမဂ္ဂကနေပြီးတော့ သူတို့အနေနဲ့
ရှိသမျှအင်အားတွေနဲ့ လောလောဆယ်အနေနဲ့ပံ့ပိုးမှုပေးနိုင်ဆုံအနေနဲ့ရော၊ နောက်ပြီး ကျနော်တို့ခေါင်းဆောင်ဒေါ်အောင်ဆန်းစုကြည်အနေနဲ့ မြန်မာပြည်မှာ ဒီမိုကရေစီနှင့် လူ့အခွင့်အရေးထွန်းကားဖို့ အနှစ်(၂၀)လုံးလုံး မဆုတ်မနစ်သော ဇွဲ၊ လုံလတွေနဲ့ ကြိုးစားဆောင်ရွက်နေတာ၊ နအဖစစ်အုပ်စုရဲ့ မတရားတဲ့နည်းတွေနဲ့ ညှင်းဆဲတာ၊ ချုပ်ချယ်တာ၊ ကန့်သတ်တာစတဲ့ အဲ့ဒီနည်းမျိုးစုံကြားထဲက အကြမ်းမဖက်တဲ့နည်းနဲ့ ကြိုးစားစွမ်းဆောင်နေတဲ့အတွက် သူတို့ကိုယ်တိုင်ကိုယ်က လေးစားလွန်းလို့ ဒီဆုကိုပေးတာပါ။

မေး-ဆုကိုဘယ်သူတွေနဲ့များသွားရောက်ယူခဲ့လဲ?

ဖြေ- ဒေါ်အောင်ဆန်းစုကြည်ကိုယ်စား ကျနော်တို့ဂျပန်NLD(LA)ရဲ့ ဥက္ကဋ္ဌကိုသန့်ဇင်ဦးက ကိုယ်စားလက်ခံရယူခဲ့ပါတယ်၊ ဥက္ကဋ္ဌနဲ့အတူ ကျနော်တို့ NLD(LA-JB)ရဲ့ တာဝန်ရှိသူတွေရယ်၊ Burma Officeကဒေါက်တာမင်းညို၊ အလုပ်သမားသမဂ္ဂကဒေါ်ခင်ဆွေအေး၊ နောက်တိုင်းရင်းသားအားလုံးရဲ့ကိုယ်စား NDFဂျပန် ကိုယ်စားလှယ်ကိုမိုင်ကျော်ဦး၊ နောက်Activistအနေနဲ့ လူ့ဘောင်သစ်ကကိုမြတ်သူ၊ LDBက ကိုကျော်ကျော်စိုး၊ ကိုမြင့်မောင်၊ စာပေအင်အားစုတွေအနေနဲ့က ကိုသက်လင်းနဲ့ PFBအနေနဲ့က ဆရာဦးရွှေဘတို့လဲလိုက်ပါသွားခဲ့ပါတယ်။


မေး-အဲဒီ့ဆုကိုဘယ်မှာပေးတာလဲ?

ဖြေ- ဂျပန်လွှတ်တော်အဆောက်အဦထဲမှာရှိတဲ့ လက်ရှိအာဏာရပါတီ၏ ပါလီမန်ရေးရာကော်မတီဥက္ကဋ္ဌရဲ့ရုံးခန်းထဲမှာပေးတာပါ။ ပေးတဲ့သူကလည်း လက်ရှိဂျပန်ပါလီမန်မှာရှိတဲ့ အနိုင်ရတဲ့ပါတီရဲ့ ပါလီမန်ရေးရာကော်မတီရဲ့ဥက္ကဋ္ဌလည်းဖြစ်သူ၊ နောက်မြန်မာ့အရေးပါလီမန်အမတ်များသမဂ္ဂရဲ့ဥက္ကဋ္ဌလည်းဖြစ်တဲ့Mr. Tadamori Oshimaက သူကိုယ်တိုင်ပေးခဲ့တာပါ။

မေး-ပြီးတော့ဒီဆုကိုပေးတဲ့အခါမှာလက်ရှိအာဏာရပါတီတခုတည်းအနေနဲ့ပေးအပ်တာလား?

ဖြေ-ကျနော်အရင်ကပြောတဲ့အထဲမှာပါသွားပြီ။ ကျနော်တို့မြန်မာ့ဒီကိုကရေစီအရေးကို ထောက်ခံအားပေးနေတဲ့သမဂ္ဂထဲမှာ အတိုက်အခံတွေလဲပါတယ်၊ အာဏာရပါတီဝင်တွေ လဲပါတယ်၊ နောက်တသီးပုဂ္ဂလအမတ်တွေလည်းပါတယ်၊ အဲဒီ့အမတ်တွေကနေ တညီတညွတ်တည်းနဲ့ပေးတာ။ ဆိုတော့ဘယ်သူ့ကို ကိုယ်စားပြုတယ်လို့ပြောလို့မရဘူး၊ အဲဒီ့အထဲမှာအစိုးရအဖွဲ့ထဲကအမတ်တွေလဲပါတယ်၊ အများစုကတော့ အတိုက်အခံပါတီဖြစ်တဲ့ Mr. Hatoyamaတို့ရဲ့ Democratic Party of Japanမှ အမတ်တွေအများဆုံးပါတယ်၊

မေး- ဒေါ်အောင်ဆန်းစုကြည်ကိုဆုချီးမြှင့်တာ ဂျပန်နိုင်ငံနဲ့ပတ်သက်ပြီး ဘယ်နှစ်ကြိမ်ရှိသွားပြီလဲ..

ဖြေ- ပထမအကြိမ်နေနဲ့ ဆိုရှယ်ဒီမိုကရက်တစ်ပါတီရဲ့ ခေါင်းဆောင်ဖြစ်ခဲ့သူ Mrs. Doi ကဦးဆောင်ပြီး ဂျပန်NGO အဖွဲ့အနေနဲ့ တကြိမ်ပေးဖူးပါတယ်။ နောက်ပြီး မြန်မာ့ဒီမိုကရေစီအရေးကို ထောက်ခံကူညီအားပေးနေတဲ့ ဂျပန်လွှတ်တော်အမတ်များသမဂ္ဂအနေနဲ့ အခုတကြိမ်ဆုချီးမြှင့်ခြင်းဖြစ်ပါတယ်။ ဒီလိုဆုချီးမြှင့်တာ ဂျပန်လွှတ်တော်အသမဂ္ဂများအဖွဲ့ရဲ့ သမိုင်းတလျှောက် မြန်မာ့ဒီမိုကရေစီအရေးနဲ့ပတ်သက်ပြီး ပထမဆုံးအကြိမ်ပဲဖြစ်ပါတယ်။

မေး-ဒေါ်အောင်ဆန်းစုကြည်ကို ဒီဆုပေးအပ်ချီးမြင့်လိုက်တဲ့အတွက် ဂျပန်နိုင်ငံအနေနဲ့ မြန်မာစစ်အစိုးရအပေါ်သဘောထားပြောင်းသွားပြီလို့ထင်လား?

ဖြေ-ဒီဆုပေးလိုက်လို့သဘောထားပြောင်းသွားပြီလို့တော့ မထင်ဘူး။ တခုတော့ရှိတယ်၊ ခင်ဗျားတို့ကျနော်တို့နားလည်ထားဖို့က၊ ဒီဆုကိုအာဏာရပါတီ၊ အတိုက်အခံအားလုံးပါတဲ့ သမဂ္ဂကပေးလိုက်တယ်ဆိုတော့ ဂျပန်အစိုးရရဲ့ရပ်တည်ချက်က မြန်မာ့ဒီမိုကရေစီအရေး ဘက်မှာ ရပ်တည်တယ်လို့ပြောလို့ရတယ်၊ နောက်ဒေါ်အောင်ဆန်းစုကြည်ဘက်မှာရှိတယ် ဆိုတဲ့သဘောလို့နားလည်လို့ရတယ်၊

မေး-အခုလိုမျိုး ကျနော်တို့ခေါင်းဆောင်ဒေါ်အောင်ဆန်းစုကြည်ကို ဂျပန်လွှတ်တော်အမတ်များကနေပြီး ဂုဏ်ပြုဆုချီးမြှင့်လိုက်ခြင်းဟာ ဂျပန်မှာရှိတဲ့ ဒီမိုကရေစီအရေး လှုပ်ရှားနေတဲ့မြန်မာတွေရဲ့ ကြိုးစားအားထုတ်မှုတစိတ်တဒေသအနေနဲ့ ရောပါတ်သက်နေတယ်လို့ ထင်ပါသလား?

ဖြေ-ခုနကပြောသလိုဒေါ်အောင်ဆန်းစုကြည်အနေနဲ့ကလဲ လေးစားသင့်လေးစားထိုက်သလို ဂျပန်မှာရှိတဲ့မြန်မာ့ဒိမိုကရေစီအရေးကိုလှုပ်ရှားနေတဲ့သူတွေရဲ့ ဒီမိုကရေစီနဲ့လှု့အခွင့်အရေးကို တစိုက်မတ်မတ်နဲ့အားကြိုးမာန်တက်လုပ်ဆောင်နေတဲ့အတွက် ဒီဆုကိုပေးဖို့ပံပိုးမှုသဘောမျိုးပါတယ်လို့လဲထင်တယ်။

မေး-နောက်ဆုံးအနေနဲ့ဒီဆုကိုကိုယ်စားသွားရောက်လက်ခံရယူခဲ့သူများထဲက တဦးဖြစ်တဲ့ ဦးသောင်းမြင့်ဦးအနေနဲ့ဘယ်လိုများခံစားမိသလဲ?

ဖြေ-ဒီဆုကိုချီးမြင့်တဲ့အတွက် ကိုယ့်ခေါင်းဆောင်အနေနဲ့များစွာဝမ်းသာမိတယ်၊ ပီတိဖြစ်မိတယ်၊ အဲဒီ့နေရာမှာဂျပန်နိုင်ငံရဲ့နိုင်ငံရေးကိုဦးဆောင်နေတဲ့ ခေါင်းဆောင်တွေ ကိုယ်တိုင်က အဲ့လိုလေးစားဂုဏ်ပြုရတယ်ဆိုရင် ကျနော်တို့နိုင်ငံသားတွေဟာ ကျနော်တို့ခေါင်းဆောင် ဒေါ်အောင်ဆန်းကြည်ကိုစံနမူနာထားပြီးတော့ ဒေါ်အောင်ဆန်း စုကြည်လိုမျိုး ကျနော်တို့နိုင်ငံသားတွေက သူတပါးလေးစားလောက်တဲ့သူတွေဖြစ်တယ်၊ ကိုယ့်ကိုကိုယ်လဲလေးစားတဲ့သူတွေဖြစ်တယ်ဆိုတာမျိုးကြိုးစားမယ်ဆိုရင် ကျနော်တို့လိုချင်တဲ့ဒီမိုကရေစီကိုအနှေးနဲ့အမြန်ရမယ်၊ ကျနော်တို့ဖွဲ့ဖြိုးတိုးတက်ချင်တယ် ဆိုတာတွေ့ရမယ်၊ ဆိုလိုတာကလူတယောက်ဟာ ကိုယ်ကိုကိုယ်လေးစားတယ်ဆိုရင် ကိုယ်လုပ်တဲ့ဟာမှန်ကန်ရတယ်၊ ကိုယ်ကိုယ်တိုင် ကိုယ်လုပ်တဲ့အလုပ်ကိုတန်ဖိုးထားရတယ်၊ အဲ့လိုမျိုး ကိုယ့်ခေါင်းဆောင်ကို သူများတွေကတောင်လေးစားတယ်ဆိုရင် ဘယ်အတိုင်းအတာထိရှိမလဲဒါတွက်လို့ရတယ်၊ ဒါဥပမာနော်-ဒေါ်အောင်ဆန်းစုကြည်လိုမျိုး (၆၄)ယောက်ရှိမယ်ဆိုရင် ကျနော်တို့နိုင်ငံမှာ နအဖစစ်အာဏာရှင်ဆိုတာ ရှိမှာတောင်မဟုတ်တော့ဘူး၊ အဲတော့ ကျနော်တို့ကလည်း ကိုယ့်ခေါင်းဆောင်ရဲ့ မွန်မြတ်တဲ့ စိတ်ဓါတ်နဲ့လုပ်ရပ်တွေကို စံနမူနာထားပြီး ဒေါ်အောင်ဆန်းစုကြည်အမြဲမှာနေတဲ့အတိုင်း စည်းကမ်းရှိရှိနဲ့ တဦးနဲ့တဦးလေးစားတဲ့ အပြောအဆို အပြုအမှုလုပ်ရပ်တွေနဲ့ တဦးချင်း တယောက်ခြင်းစီက ကိုယ့်နိုင်ငံအတွက် ကြိုးစားကြမယ်ဆိုရင် ကျနော်တို့တိုင်းပြည်ရဲ့ မဝေးတော့တဲ့ အနာဂတ်ဒီမိုကရေစီပန်းတိုင်ကို အရယူနိုင်မှာဖြစ်တယ်လို့ ပြောချင်ပါတယ်

ဓါတ်ပုံများကို http://phyowai-mmp.blogspot.com/ မှ ကူးယူဖော်ပြခြင်းဖြစ်ပါသည်။

Posted in: