အနှစ် (၂၀) နိုင်ငံရေးအကျဉ်းသား သတင်းစာဆရာကြီး ဦးဝင်းတင်လွတ်ပြီ(ခေတ်ပြိုင်မှ) ~ မိုးသောက်ကြယ်

Wednesday, September 24, 2008

အနှစ် (၂၀) နိုင်ငံရေးအကျဉ်းသား သတင်းစာဆရာကြီး ဦးဝင်းတင်လွတ်ပြီ(ခေတ်ပြိုင်မှ)

12:10 AM moethaukkye No comments

ပီတာအောင်/ ၂၃ စက်တင်ဘာ ၂၀၀၈။ ။

အင်းစိန်ထောင်၌ အကျဉ်းကျခံနေရသည်မှာ (၁၉) နှစ်ကျော်ရှိနေပြီဖြစ်သည့် ၀ါရင့်သတင်းစာ ဆရာကြီး ဦးဝင်းတင်ကို ယနေ့ ညနေပိုင်းတွင် စစ်အစိုးရက ထောင်မှ ပြန်လွှတ်ပေး လိုက်သည်ဟု မျက်မြင်သက်သေတဦးက ပြောသည်။

ထောင်မှ လွတ်လွတ်ချင်း ဆရာ ဦးဝင်းတင်ပြောသည့်စကားမှာ “မြန်မာနိုင်ငံ ဒီမိုကရေစီ ရတဲ့အထိ ကျနော် ဆက်လက် တိုက်ပွဲဝင်သွားမယ်” ဟု ရိုက်တာသတင်းတွင် ဖော်ပြထားသည်။

ဦးဝင်းတင်၏ အရင်းနှီးဆုံးမိတ်ဆွေ ဦးမောင်မောင်ခင်၏ သားဖြစ်သူက “ဒီနေ့ ညနေ (၄) နာရီခွဲလောက်မှာ အိမ်ကိုပြန် ရောက်လာပါတယ်။ ကျန်းကျန်းမာမာပါပဲ။ အိမ်မှာ ဧည့်သည်တွေရော၊ သတင်းထောက်တွေရော အများကြီးပဲ ဦးဝင်း တင်ကို ၀ိုင်းမေးနေကြတယ်” ဟု ပြောသည်။

အကျဉ်းသား (၉,၀၀၂) ဦးအား ၂၀၁၀ ရွေးကောက်ပွဲတွင် အများပြည်သူတို့နှင့်အတူ နိုင်ငံတော်အကျိုးကို ထမ်းရွက် သွားနိုင်စေရန် ပြန်လွှတ်ပေးလိုက်ကြောင်း ယနေ့ထုတ် စစ်အစိုးရပိုင် သတင်းစာများတွင် ကြေညာခဲ့ပြီး ဦးဝင်းတင် အပါအ၀င် နိုင်ငံရေးအကျဉ်းသားအချို့ ယနေ့ပြန်လွှတ်မည်ဟု ယနေ့ နံနက်ပိုင်းကတည်းက သတင်းထွက်နေခဲ့ရာမှ ညနေပိုင်း၌ ဦးဝင်းတင် ပြန်လွတ်မြောက်လာခြင်းဖြစ်သည်။

ဦးဝင်းတင်သည် ဟံသာဝတီ သတင်းစာအယ်ဒီတာချုပ်ဟောင်းနှင့် အမျိုးသားဒီမိုကရေစီအဖွဲ့ချုပ် ဗဟိုအလုပ်အမှု ဆောင်ကော်မတီဝင် အတွင်းရေးမှူးအဖြစ် တာဝန်ယူခဲ့သူဖြစ်သည်။ ၁၉၈၉ ခု ဇူလိုင် (၄) ရက်တွင် ဖမ်းဆီးခံရပြီး အလုပ်ကြမ်းနှင့် ထောင်ဒဏ် (၃) နှစ်ချမှတ်ခဲ့သည်။ လွတ်ရက်စေ့ကာနီး ၁၉၉၂ မတ်လတွင် ထောင်ဒဏ် (၁၀) နှစ် ထပ်မံချခံရပြီး ထောင်တွင်း ညှဉ်းပန်းနှိပ်စက်မှုများကို ကုလသမဂ္ဂ အထူးကိုယ်စားလှယ်ထံ စာရေးတိုင်ကြားမှုဖြင့် ၁၉၉၆ မတ်လ၌ နောက်ထပ် ထောင်ဒဏ် (၇) နှစ် ထပ်ဆင့် ချမှတ်ခံခဲ့ရသည်။

အသက် (၇၉) နှစ်ရှိပြီဖြစ်သည့် ဦးဝင်းတင်သည် အကျဉ်းထောင်တွင်း၌ သွေးတိုး၊ နှလုံး၊ ဆီးချိုနှင့် အရိုးကျီးပေါင်းတက် ဝေဒနာများ ခံစားနေရပြီး ပြီးခဲ့သည့် ဇူလိုင်လက ထောင်သက်တမ်း (၁၉) နှစ်ပြည့်ပြီဖြစ်ကာ သက်တမ်းကျော်လွန်ပြီး ဖမ်းဆီးခံထားရသည့် နှစ်ရှည် နိုင်ငံရေးအကျဉ်းသားဖြစ်သည်။

နိုင်ငံရေးမလုပ်တော့ပါဟု ခံဝန်ချက်ကတိ လက်မှတ်ရေးထိုးလျှင် ပြန်လွှတ်ပေးမည်ဟု စစ်အစိုးရက အကြိမ်ကြိမ် ကမ်းလှမ်းခဲ့သော်လည်း ဦးဝင်းတင်က ထိုကမ်းလှမ်းချက်ကို တောက်လျှောက်ပယ်ချခဲ့သည်။ ၂၀၀၅ ဇူလိုင်လတွင် အာဏာပိုင်များက ဦးဝင်းတင်ကို ပြန်လွှတ်ပေးရန် စီစဉ်ခဲ့ပြီး အင်းစိန်ထောင်ဗူးဝသို့ ရောက်ရှိပြီးကာမှ ထောင်မှူးက ပြန်ခေါ်ဆောင်ကာ ပြန်လည် အကျဉ်းချထားခြင်း ခံခဲ့ရသည်။

လွတ်လပ်စွာ ဆန္ဒထုတ်ဖော်ခွင့်အတွက် ဦးဝင်းတင်၏ ဆောင်ရွက်ချက်များကြောင့် ၂၀၀၁ ခုတွင် ယူနက်စကိုက ကမ္ဘာ့စာနယ်ဇင်း လွတ်လပ်ခွင့်ဆု၊ ကမ္ဘာ့သတင်းစာများအသင်းက လွတ်လပ်ခွင့် ရွှေကလောင်ဆုနှင့် ၂၀၀၆ ခုတွင် နယ်ခြားမဲ့ သတင်းထောက်များအဖွဲ့က သတင်းသမားဆု ချီးမြှင့်ခဲ့သည်။