ဓမ္မနဲ့ အဓမ္မပြိုင်ပွဲ(ကိုသက်)

ဓမ္မနဲ့ အဓမ္မယှဉ်ပြိုင်
သူနိုင် ကိုယ်နိုင်ဆင်နွှဲ
သမိုင်းဝင်တဲ့ သည်ပွဲ...

တရားမျှတ
ဓမ္မရဲ့ ဘက်တော်သား
မေတ္တာသုတ်တော် အစဉ်ပွား...

မိတ်ဆွေရန်သူ လူခပ်သိမ်း
ငြိမ်းချမ်းစေတဲ့ လက်နက်
မေတ္တာဖျန်းပက် ဓမ္မစက်...

ဓမ္မကိုအန်တု
ရန်ပြုသူများ
အဓမ္မဘက်တော်သား...

တုတ်ဓားကိုဆောင်
သေအောင်လည်း သူတို့သတ်
ညစ်ပစ်သမျှ ကမ်းကုန်
အကြမ်းအရမ်း အစွမ်းကုန်...

သေနတ်ကိုင်မှ မိုက်ရဲ
သတ္တိခဲ စစ်သား
တုတ်ဓားတွေနဲ့ စွမ်းအားရှင်
မတရားသူတို့ အဖွဲ့ဝင်...

လူထုနဲ့ကျောင်းသား
သေနတ်ဖျားမှာ ကျဆုံး
ယူကြုံးမရ ဖြစ်ရတယ်...

သံဃာတော်အရှင်မြတ်
ဖြတ်လေးဖြတ်နဲ့ ဒင်းတို့သတ်
ဆွမ်းငတ်ကုန်ပြီ...

မေတ္တာပွားတဲ့ ရဟန်းတွေ
သေနတ်ဖျားမှာ ဇီဝိန်ကြွေ
သွေးစွန်းပေတဲ့ သင်္ကန်းစ
ကျောင်းသင်္ခမ်း အ၀မှာ...

လောကသစ္စာ
ဤလူ့ရွာဝယ်
အလှည့်ဆိုတာ ရှိသေးတယ်...

ရှင်နေမင်းကြီးတောင်
သုံးကျွန်းလင်းတဲ့ အခိုက်မှာ
တကျွန်းမိုက်ရသေးတယ်...

ကံကောင်းဆဲ ခဏကို
ထာဝရထင်လို့ မိုက်ကန်းရင်
ဇတ်သိမ်းခန်း လှပါ့မလား...

နောက်ဆုံးတနေ့မှာ
ဓမ္မဆိုတာ အောင်ရစမြဲ
ဇွဲမလျှော့နဲ့...။

(ကိုသက်)

Posted in: ကိုသက်ကဗျာများ(Ko Thet's Poem)