ယနေ့(ဇွန်လ ၁၉)ရက်နေ့တွင် ကျရောက်သည့် မြန်မာဒီမိုကရေစီမီးရှုးတိုင်၊ ငြိမ်းချမ်းရေးနိုလ်ဘယ်လ်ဆုရှင်၊ ပြည်သူအပေါင်း လေးစားချစ်ခင်ကြသည့် လူထုခေါင်းဆောင် ဒေါ်အောင်ဆန်းစုကြည်၏ ၆၆ နှစ်မြောက် မွေးနေ့အထိမ်းအမှတ်အဖြစ် ဂျပန်နိုင်ငံရှိ မြန်မာပြည်သူ/သားများမှ ဇီဝိတဒါနငါးလွှတ်ခြင်း၊ စုပေါင်းသွေးလှူခြင်းနှင့် အခြားသော ကောင်းမှုကုသိုလ်ပြုပွဲများကို သိုက်သိုက်ဝန်းဝန်းကျင်းပသွားခဲ့ကြကြောင်း သိရှိရသည်။
အဆိုပါကောင်းမှုကုသိုလ်ပြုပွဲများကို မိုးသောက်ကြယ်စာကြည့်တိုက်မှကမကထ ပြုလုပ်ခဲ့ခြင်းဖြစ်ပြီး ယခုအခါ ၁၁ ကြိမ်မြောက်ရှိသွားပြီဟု တာဝန်ခံတစ်ဦးဖြစ်သူ မတင်တင်ဝင်းမှ ရှင်းပြခဲ့သည်။
“ကျမတို့အနေနဲ့ ကျမတို့လေးစားတဲ့ ချစ်မြတ်နိုးတဲ့ ဒေါ်အောင်ဆန်းစုကြည်မွေးနေ့ရောက်တိုင်း သွေးလှူတာတို့၊ ဇီဝိတဒါနအဖြစ် ငါးလွှတ်တာတို့ နောက်ပြီး နယ်စပ်မှာရှိတဲ့မြန်မာကလေးစာသင်ကျောင်းတစ်ချို့မှာ အာဟာရဒါနကျွေးမွေးတာတို့၊ ဆန် ဆီ ဆားအစရှိသဖြင့် လှူတန်းတာတို့ကို နှစ်စဉ်ကျင်းပပြုလုပ်လေ့ရှိပါတယ်။ သွေးလှူတာနဲ့ ငါးလွှတ်တာက ယခုအကြိမ်နဲ့ဆို ၁၁ ကြိမ်ရှိသွားပါပြီ။ မိုးသောက်ကြယ်စာကြည့်တိုက်အမည်မပေါ်ခင်ကတည်းက ဒေါ်အောင်ဆန်းစုကြည်မွေးနေ့ ရောက်တိုင်း ဒေါ်စုကိုလေးစားတဲ့သူတွေနဲ့ အခုလိုမျိုး စုပေါင်းပြုလုပ်နေကြပါ။ ဒီနှစ်မှာတော့ ယခင်နှစ်တွေနဲ့မတူပဲ ကျမတို့နဲ့အတူတကွပူးပေါင်းပြီး ငါးလွှတ်တာတို့ သွေးလှူတာတို့စတဲ့ ကုသိုလ်ပြုပွဲတွေမှာ ပါဝင်လာကြသူများတာကိုတွေ့ရပါတယ်။ ၀မ်းသာမိသလို သာဓု သာဓု သာဓုလို့လည်း လှိုက်လှိုက်လှဲလှဲခေါ်လိုက်ပါတယ်..”ဟု မတင်တင်ဝင်းမှဆိုသည်။
ဇီဝိတဒါနငါးလွှတ်ခြင်းကို ဦးစွာပထမကောင်းမှုကုသိုလ်ပြုလုပ်ခဲ့ကြပြီး ယခင်နှစ်ကပြုလုပ်ခဲ့သည့် ဆိုင်းတမခရိုင်၊ ခါဝါခုချီ(Kawaguchi)ဘူတာအနီးရှိ Arakawaမြစ်တွင် ပြုလုပ်ခဲ့ကြသည်။
တိုကျိုနှင့်ဝေးလံသည့် ဂွန်းမဒေသမှ လာရောက်ကုသိုလ်ပြုသူ မဌေးဌေးဝင်းက “ဒေါ်အောင်ဆန်းစုကြည်မွေးနေ့မှာ ဇီဝိတဒါနကောင်းမှုကုသိုလ်ပြုတဲ့အနေနဲ့ ငါးလွှတ်မယ်လို့သိရလို့ မိုးသောက်ကြယ်နဲ့အတူ ကုသိုလ်ပြုပွဲမှာပါဝင်ဆင်နွှဲနိုင်ဖို့အတွက် လာရောက်ခြင်းဖြစ်ပါတယ်။ ငါးလွှတ်တယ်ဆိုတာကလည်း သူတစ်ပါးရဲ့အသက်ကိုလွတ်လွတ်လပ်လပ်နဲ့ အသက်ရှင်ခွင့်ပေးတာ။ ကျမတို့ခေါင်းဆောင်ကလည်း လွတ်လပ်မှုကိုတန်ဖိုးထားတဲ့သူတစ်ဦးပါ။ နောက်ပြီး မတရားအကျဉ်းကျခံနေရတဲ့ နိုင်ငံရေးအကျဉ်းသားတွေလည်း အမြန်ဆုံးလွတ်မြောက်စေချင်တဲ့ဆန္ဒလည်းပါတာပေါ့လေ။ ဒါကြောင့် အခုလိုငါးလွှတ်တဲ့ကုသိုလ်ပြုပွဲမှာ မိုးသောက်ကြယ်နဲ့အတူ လာရောက်ကုသိုလ်ယူခြင်းဖြစ်ပါတယ်”ဟု ပြောဆိုသည်။
တိုကျိုမြို့၊ အိခဲဘုခုရိုအရပ်တွင်နေထိုင်သည့် မပုလဲဆိုသူကတော့ “ ကျမတို့ခေါင်းဆောင်က နိုင်ငံရေးအကျဉ်းသားတွေလွတ်မြောက်စေချင်တဲ့ဆန္ဒရှိတယ်လေ။ ဒါကြောင့် ဒေါ်စုမွေးနေ့မှာ နိုင်ငံရေးအကျဉ်းသားတွေလွတ်မြောက်စေဖို့အတွက်ရည်ရွယ်ပြီး အတူတကွကုသိုလ်ပြုဖို့ လိုက်လာတာပါ”ဟု ပြောဆိုပြီး မိုးသောက်ကြယ်မှဦးစီးပြုလုပ်သည့် ထိုင်းနယ်စပ်ရှိ မြန်မာတိုင်းရင်းသားကလေးများအတွက် အာဟာရဒါနကုသိုလ်ပြုပွဲတွင်လည်း အလှူငွေထည့်ဝင်သွားခဲ့သည်။
ထို့နောက် နေ့လယ် ၁း၀၀ နာရီတွင် တိုကျိုလျှပ်စစ်မြို့တော်ဟု ခေါ်ဝေါ်နေကြသည့် Akihabaraရှိ သွေးလှူဘဏ်၌ မိုးသောက်ကြယ်အဖွဲ့သားများနှင့် ဂျပန်ရှိမြန်မာ့ဒီမိုကရေစီရေးလုပ်ဆောင်နေကြသည့်အဖွဲ့အစည်းတစ်ချို့မှ အဖွဲ့ဝင်များလည်း အတူတကွသွေးလှူတန်းခဲ့ကြသည်။
အမျိုးသားဒီမိုကရေစီအဖွဲ့ချုပ်(လွတ်မြောက်နယ်မြေ-ဂျပန်ဌာနခွဲ)မှ အဖွဲ့ဝင်တစ်ဦးဖြစ်သူ ကိုထွန်းဝေက“ ကျနော်အနေနဲ့ ပုံမှန်သွေးလှူဖြစ်ပါတယ်။ သွေးလှူတယ်ဆိုတာကလည်း လူ့အသက်ကိုကယ်တင်တာပဲလေ။ ကောင်းမှုကုသိုလ်ပြုခြင်းတစ်မျိုးပေါ့နော်။ ဒီနေ့မှာ မိုးသောက်ကြယ်က ကမကထပြုပြီးလုပ်တဲ့သွေးလှူခြင်းအခမ်းအနားမှာ အတူတကွကုသိုလ်ပြုတာကတော့ ကျနော်တို့ခေါင်းဆောင်ရဲ့နေ့ထူးနေ့မြတ် (၆၆)နှစ်မြောက်မွေးနေ့လည်းဖြစ်နေတယ်။ အဲဒီ့နေ့မှာ အမှတ်တရအနေနဲ့ ပါဝင်ကုသိုလ်ပြုခြင်းလို့ အခုလိုမျိုးသွေးလှူတန်းခြင်းဖြစ်ပါတယ်”ဟုဆိုသည်။
ယခုနှစ်တွင် သွေးလှူဘဏ်များ၌ သွေးလှူတန်းခြင်းဆိုင် လုပ်ထုံးလုပ်နည်းများ အနည်းငယ်ပြောင်းလဲသွားပြီး၊ စည်းကမ်းတစ်ချို့ တင်းကျပ်မှုများရှိလာသော်လည်း အများစုမှာ လှူတန်းခွင့်ရရှိခဲ့ကြသည်။ မိုးသောက်ကြယ်အဖွဲ့သားများနှင့် တခြားသော အဖွဲ့ဝင်များမှ ဒေါ်အောင်ဆန်းစုကြည်မွေးနေ့အထိမ်းအမှတ်အဖြစ် သွေးလှူနေကြစဉ် မှတ်တမ်းတင်ဓါတ်ပုံနှင့် ဗီဒီယိုရိုက်ကူးခြင်းများကို တာဝန်ခံများမှခွင့်ပြုခဲ့ကြောင်းလည်း တွေ့ရှိရသည်။
ယနေ့နံနက်ပိုင်းတွင် ထိုင်း-မြန်မာနယ်စပ်ရှိ မြန်မာတိုင်းရင်းသား ကလေးစာသင်ကျောင်း(၃)ကျောင်း (သွေးသစ်ကျောင်း၊ ဆာမူထောကျောင်းနှင့် နမ်တွတ်ကျောင်း)တို့တွင် ဒေါ်အောင်ဆန်းစုကြည်မွေးနေ့အထိမ်းအမှတ် အာဟာရဒါနပြုလုပ်ခဲ့ရာ စုစုပေါင်း ကလေးဦးရေ ၈၀၀ ကျော်ကို နံနက်စာထမင်းကျွေးမွေးခဲ့ကြသည်။
ထို့အပြင် ထိုင်းနိုင်ငံ မဲဆောက်မြို့၊ မယ်တော်ကျောင်းတွင် ဇွန်လ ၁၉ ရက်(တနင်္ဂနွေ)နေ့၊ နေ့လယ် ၂း၀၀ နာရီမှစတင်ပြုလုပ်မည့် ဆွမ်းဆန်စိမ်းလောင်းလှူပွဲတွင်လည်း ဒေါ်အောင်ဆန်းစုကြည်မွေးနေ့အထိမ်းအမှတ်အဖြစ် သံသရာဆင်းရဲခြင်းဒုက္ခအပေါင်းမှ လွတ်ကင်းရာ လွတ်ကင်းကြောင်း ရည်မှန်း၍ ဆန်နှင့် အခြားလှူဖွယ်ဝတ္ထုပစ္စည်းများကို ဆက်ကပ်လှူတန်းကြခဲ့ကြောင်းလည်းသိရှိရသည်။
(မိုးသောက်ကြယ်စာကြည့်တိုက်အဖွဲ့သားများ၏ အာဟာရဒါနပြုလုပ်မည့်အစီအစဉ်များကို ထိုင်းနိုင်ငံ၊ မဲဆောက်ရှိ လူသားအရင်းအမြစ် ဖွံ့ဖြိုးတိုးတက်ရေး အစီအစဉ်(HRDP)မှ တာဝန်ခံတစ်ဦးဖြစ်သူ ကိုစည်သူမှ တာဝန်ယူဆောင်ရွက်ပေးခြင်းဖြစ်သည်။ ဆွမ်းဆန်စိမ်းလောင်းလှူမည့် ကုသိုလ်ဒါနပြုပွဲကို တိုကျိုမြို့အခြေစိုက် လူသားအရင်းအမြစ် ဖွံ့ဖြိုးတိုးတက်ရေးအစီအစဉ်(ဂျပန်) HRDP-JAPANမှ ကမကထပြုလုပ်ခဲ့ခြင်းဖြစ်ပြီး မိုးသောက်ကြယ်အဖွဲ့သားများမှ ၀င်ရောက်ကုသိုလ်ပြုခြင်းဖြစ်သည်။)
လာမည့် ဇွန် ၂၆ ရက်(တနင်္ဂနွေ)နေ့တွင်လည်း ဒေါ်အောင်ဆန်းစုကြည်မွေးနေ့အထိမ်းအမှတ် နိုင်ငံရေးအကျဉ်းသားများအတွက် ကူညီထောက်ပံ့ခြင်းအစီအစဉ်တရပ်အနေဖြင့် အညတရသူရဲကောင်းများဆုခြင်းမြှင့်ရေးဆပ်ကော်မတီ(ဂျပန်)သို့ မိုးသောက်ကြယ်စာကြည့်တိုက်နှင့် မိုးသောက်ကြယ်ဂျာနယ်အဖွဲ့သားများမှ ယန်းငွေ ၇ သောင်းပေးအပ်မည်ဖြစ်ပြီး စိတ်ပါဝင်စားသူ မည်သူမဆို လာရောက်နိုင်ပါကြောင်းလည်း ဖိတ်ခေါ်ထားသည်။
ထို့အတွက်ကြောင့် မိမိတို့လေးစားချစ်မြတ်နိုးသည့် ဒေါ်အောင်ဆန်းစုကြည်(၆၆)နှစ်ပြည့် မွေးနေ့အထိမ်းအမှတ် ကောင်းမှုကုသိုလ်ပြုပွဲများတွင် စိတ်ရင်းစေတနာသန့်သန့်ဖြင့် လာရောက်ပူးပေါင်းကုသိုလ်ပြုခဲ့ကြသူများ၊ အလှူငွေထည့်ဝင်ခဲ့ကြသူများနှင့် မှတ်တမ်းတင်ခဲ့ကြသူများအားလုံးကို ကျေးဇူးဥပကာတင်ရှိပါကြောင်း…..
အလှူငွေထည့်ဝင်ခဲ့ကြသည့် အလှူရှင်အမည်များနှင့် ငွေစာရင်းကိုလည်း မကြာမှီဖော်ပြပေးပါမည်။
သတင်းနှင့် မှတ်တမ်းဓါတ်ပုံများကိုလည်း မည်သူမဆို ခွင့်တောင်းစရာမလိုပဲ လွတ်လပ်စွာသုံးစွဲနိုင်ပါကြောင်းလည်း အသိပေးအပ်ပါသည်။
အလှူငွေထည့်ဝင်ခဲ့ကြသည့် အလှူရှင်အမည်များနှင့် ငွေစာရင်းကိုလည်း မကြာမှီဖော်ပြပေးပါမည်။
သတင်းနှင့် မှတ်တမ်းဓါတ်ပုံများကိုလည်း မည်သူမဆို ခွင့်တောင်းစရာမလိုပဲ လွတ်လပ်စွာသုံးစွဲနိုင်ပါကြောင်းလည်း အသိပေးအပ်ပါသည်။
ရေးသားသူ-မောင်ရှင်(MTK)
မှတ်တမ်းဓါတ်ပုံ-မင်းညိုဝမ်း(MTK)၊ ဟန်ဝင်းထွန်း(MTK)
0 comments:
Post a Comment