၂၀၁၀ ရွေးကောက်ပွဲပြီးလျင် ပြန်ပို့ခံရမည်ဆိုသည့်အသံများကြောင့် ဂျပန်ရောက်မြန်မာများ တတိယနိုင်ငံသို့ထွက်ခွာဖို့ကြိုစားသူများပြားနေ

မြန်မာပြည်တွင်း၌ ၂၀၁၀ ရွေးကောက်ပွဲသာ ကျင်းပပြုလုပ်ပြီးစီးခဲ့ပါက ဂျပန်ရှိ ဒုက္ခသည်ခိုလှုံခွင့်လျှောက်ထားသူများနှင့် ၎င်းဗီဇာဖြင့်နေထိုင်သူများအားလုံးကို ဂျပန်အစိုးရမှပြန်ပို့လိမ့်မည်ဆိုသည့်အသံများကြောင့် တတိယနိုင်ငံသို့ထွက်ခွာ၍ အခြေချနေထိုင်ဖို့ကြိုးစားပြင်ဆင်နေကြသူများ တဖြည်းဖြည်းနှင့်များပြားနေလျက်ရှိ ကြောင်းစုံစမ်းသိရှိရသည်။

ထွက်ခွာဖို့ကြိုးစားသူအများစုမှာ ဂျပန်အစိုးရမှ ဒုက္ခသည်အဖြစ်(ဂျပန်ရောက် မြန်မာများအခေါ်`R`ဗီဇာ) အသိအမှတ်ပြုဖို့ ငြင်းပယ်ခံထားရပြီး တိုင်းပြည်အခြေအနေမတည်ငြိမ်သေးသဖြင့် တစ်နှစ်သက်တမ်းဗီဇာသဘောမျိုးထုတ်ပေး ထားသော Designated Activities Visa(ဂျပန်အခေါ် တော့ခုတေးခဆုဒိုးခဗီဇာ)ရရှိထားသူ များဖြစ်ကြသည်။

”အခုကြားနေရတဲ့အသံတွေက ဟုတ်မဟုတ်တော့မသိဘူး။ ၂၀၁၀ ရွေးကောက်ပွဲပြီးရင် ဂျပန်အစိုးရက ကျနော်တို့လို တော့တေးဗီဇာသမားတွေကိုရော လျှောက်ထားဆဲတွေကိုပါ ပြန်ပို့လိမ့်မယ်ဆိုတဲ့အသံတွေက တော်တော့်ကိုပြန့်နေတယ်။ တော်ကြာ မတော်လို့ပြန်ပို့ခံရတယ်ဆိုရင် ဒုက္ခရောက်မှာလေ။ ဒါကြောင့် တတိယနိုင်ငံကို ကူးပြောင်းအခြေချဖို့ကြိုးစားနေတာပါ….“ဟု တော့ခုတေးဗီဇာရရှိသူတဦးမှ မိုးသောက်ကြယ်သို့ရှင်းပြသည်။

တော့ခုတေးဗီဇာသမားများသည် ပြည်ပသို့ထွက်လည်ခွင့်ရှိသော်လည်း၊ မိသားစုခေါ်ယူခွင့်၊ ကျန်းမာရေးအကျိုးခံစားခွင့်၊ အလုပ်မလုပ်နိုင်သည့်အတွက် လူမှုဖုံလုံရေးအကျိုးခံစားခွင့်များမရရှိနိုင်ပေ။ ထို့အတွက်ကြောင့် ၂၀၀၉ ခုနှစ် ဒီဇင်ဘာလ ၁၄ ရက်နေ့က တော့ခုတေးဗီဇာရရှိထားသူ မြန်မာနိုင်ငံကူးစာအုပ်ကိုင်ဆောင်ထားသူ ၃၇ ဦးသည် တိုကျိုမြို့၊ ရှင်နာဂါဝါရပ်ကွက်ရှိ ဂျပန်လှုဝင်မှုကြီးကြပ်ရေးရုံးသို့သွားရောက်၍ ဂျပန်နိုင်ငံတွင် ‘R’ဗီဇာသမားများကဲ့သို့ ရေရှည်အခြေချနေထိုင်ခွင့်ဗီဇာ(Long Term Resident Visa)ပေးရန် ပြောင်းလဲလျှောက်ခဲ့ကြသေးသည်။

“ကျနော်တို့က အခုမှ တခြားနိုင်ငံမှာအခြေချဖို့ကြိုးစားနေတာပါ။ ကျနော်တို့ထက် စီနီယာကျပြီး ‘R’ဗီဇာရရှိထားတဲ့ ဆရာ့ဆရာကြီးတော်တော်များများတောင် အမေရိကားတို့၊ ကနေဒါတို့၊ သြစတြေးလျတို့မှာ အခြေချနေထိုင်နေတာ ဆယ်စုနှစ်တစုတောင် ကျော်နေပြီ။ အဲဒီမှာ ဂရင်းကဒ်တို့၊ နိုင်ငံသားတို့တောင်ရလို့ ဂျပန်ကို သွားလိုက်ပြန်လိုက်လုပ်နေကြတာပဲဥစ္စာ။ တချို့ဆို ဂျပန်ကပေးထားတဲ့ ‘R’ဗီဇာ အဆုံးမခံနှိုင်လို့ သက်တမ်းကုန်ခါနီးကျရင် ဒီမှာသက်တမ်းလာတိုးပြီး ဟိုနိုင်ငံကထုတ်ပေးထားတဲ့ နိုင်ငံကူးစာအုပ်ရော ဒီကစာအုပ်ရော စာအုပ်နှစ်ကိုင်ထားတဲ့သူတွေတောင် အများကြီးပဲလေ…”ဟု အဆိုပါလူများ၏လုပ်ရပ်ကို အားကျနေသည့် တော့ခုတေးဗီဇာသမားတဦးက ယခုလိုဆိုသည်။

ဂျပန်နိုင်ငံတွင် မြန်မာလူမျိုးများ ဒုက္ခသည်အဖြစ် ခိုလှုံခွင့်လျှောက်ထားခဲ့မှုမှာ ၁၉၉၀ ၀န်းကျင်မှစတင်ခဲ့ခြင်းဖြစ်သည်။ ၂၀၀၃ ခုနှစ် မေ ၃၀ ဒီပဲယင်းလုပ်ကြံမှုကြီး ပေါ်ပေါက်ပြီးသည့်နောက်ပိုင်းတွင် ဒုက္ခသည်ခိုလှုံခွင့်လျှောက်ထားသူဦးရေ များပြားလာခဲ့ပြီး ၎င်းကိစ္စကြောင့် ဂျပန်အစိုးရမှ ဒုက္ခသည်လျှောက်ထားသူ မြန်မာလူမျိုးများကိုလွယ်လွယ်ကူကူ အသိအမှတ်ပြုပေးလာခဲ့ သည်။

လျှောက်ထားသူအများစုမှာ ဂျပန်နိုင်ငံတွင် မြန်မာ့ဒီမိုကရေစီရေးရရှိအောင် စွမ်းစံတမန် လုပ်ပြနေခြင်းကြောင့် မြန်မာပြည်ပြန်ရောက်ပါက မိမိ၏အသက်အန္တရာယ်လုံခြုံမှုမရှိသဖြင့် ဒုက္ခသည်အဖြစ် အသိအမှတ်ပြုပေးပါရန် တောင်းခံခဲ့ကြခြင်းဖြစ်သည်။

‘R’ဗီဇာ သို့မဟုတ် အထူးနေထိုင်ခွင့်ဗီဇာ၊ တော့ခုတေးဗီဇာရရှိသွားပါက အများစုမှာ မြန်မာ့ဒီမိုကရေစီရေးလုပ်ဆောင်မှုများနှင့်ကင်းကွာသွားကြပြီး၊ စီးပွားရှာသည့်ဖက်နှင့် မိမိဆွေမျိုးမိသားစုများ ဂျပန်နိုင်ငံသို့ခေါ်ယူရေးဖက်ကိုသာ ရေရှည်စီမံကိန်းချ၍ ဦးနှစ်လုပ်ဆောင်နေကြသည်။

တတိယနိုင်ငံသို့ရွေ့ပြောင်းအခြေချဖို့ ခေတ်စားအောင် ဦးဆောင်လမ်းပြခဲ့သူများမှာလည်း တစ်ခေတ်တချိန်က ဂျပန်ရှိ မြန်မာ့နိုင်ငံရေးအဖွဲ့အစည်းအသီးသီးတွင် ဥက္ကဋ္ဌ၊ ဒု-ဥက္ကဋ္ဌ၊ အတွင်းရေးမှူး၊ ဗဟိုအလုပ်အမှုဆောင်ကော်မတီလူကြီး အစရှိသောနေရာများတွင် ရာထူးကြီးကြီးယူခဲ့ကြ၍ တက်ကြွစွာလုပ်ပြခဲ့ပြီး ယခုအခါ အမေရိကန်၊ ကနေဒါ၊ သြစတြေးလျအစရှိသည့်နိုင်ငံများတွင် ဘ၀ဇာတ်မြှုပ်သွားကြသူများသည်။

လက်ရှိအဖွဲ့အစည်းတချို့မှ ကြီးကြီးမာစတာများမှာလည်း ယခုနှစ်အတွင်း တတိယနိုင်ငံသို့ အမြန်ဆုံးကူးပြောင်းနိုင်အောင် တိတ်တိတ်ပုန်းကြိုးစားနေလျက်ကြောင်း သိရှိရပြီး တချို့မှာ ၂၀၁၀ ရွေးကောက်ပွဲပြီးစီးသဖြင့် ပြန်ပို့ခံရပါက ဂျပန်နိုင်ငံတွင် တက်ကြွစွာနိုင်ငံရေးလုပ်ဆောင်ခဲ့မှုကြောင့် အရေးယူခံမည်ကိုစိုးရိမ်သဖြင့် `ထင်သာ မြင်သာ`နိုင်ငံရေးနှင့်၊ `လေလှိုင်းနိုင်ငံရေး`သဘောမျိုးသာ လုပ်ဆောင်ကြတော့သည်။

ဂျပန်အစိုးရသည် နအဖစစ်ခေါင်းဆောင်များနှင့်တွေ့ဆုံတိုင်း ဒေါ်အောင်ဆန်းစုကြည်နှင့် နိုင်ငံရေးအကျဉ်းများလွတ်ပေးဖို့နှင့် ၂၀၁၀ ရွေးကောက်ပွဲကို လွတ်လပ်ပြီး တရားမျှတစွာဖြင့် အမြန်ဆုံးကျင်းပပြုလုပ်ဖို့ကိုသာ ဖိအားပေးတောင်းဆိုနေလျက်ရှိသည်။
၂၀၁၀ ရွေးကောက်ပွဲသာ ကျင်းပပြီးစီးခဲ့ပါက ဂျပန်အစိုးရအနေဖြင့် ODA အပါအ၀င် အခြားသောထောက်ပံ့မှုများ ပြန်လည်ပေးအပ်မှာဖြစ်ကြောင်း ကတိပေးပြောကြားထားသည်ဟု သိရှိရသည်။

ရေးသားသူ-စိုးဝင်းရှိန်

Posted in: ဂျပန်လှုပ်ရှားမှုသတင်း(Japan Movement News)