ခိုးကြောင်ခိုးဝှက်နည်းဖြင့် ထောက်ခံဆန္ဒမဲတောင်းယူပွဲ ဂျပန်နအဖစစ်အခွန်ရုံးက ဆက်လက်လုပ်ဆောင်နေ

ဖုန်းဆက်ခေါ်သည့်အတွက် ထောက်ခံမဲပေးဖို့သွားကြရသူများ

တရားဝင်ကြေညာထားသော ဧပြီလ ၂၆ ရက်(စနေနေ့)နှင့် ၂၇ ရက်(တနင်္ဂနွေနေ့)များတွင် လာရောက်ပြီး ထောက်ခံမဲမပေးရသေးသူများကို ယနေ့(ဧပြီ ၂၈ ရက်)မှစ၍ မေလဆန်းပိုင်းအထိ လာရောက်မဲပေးနိုင်ကြောင်း ဂျပန်နိုင်ငံရှိ နအဖစစ်အခွန်ရုံးက ဖုန်းဆက်အကြောင်းကြားကာ တိုးတိုးတိတ်တိတ်ပြုလုပ်နေပါတယ်။

ဖိတ်စာပို့ပြီး လက်ရွေးစင်ဖိတ်ကြားထားသူ ၂၂၇၄ ဦးရှိပြီး၊ အဆိုပါလူများမှာ မြန်မာနိုင်ငံကူးလက်မှတ်စာအုပ် အစိမ်းကိုင်ဆောင်ထားသူ ပညာတော်သင်နှင့်အလုပ်သင်များအားလုံးနှင့် ကျောင်းသား/ကျောင်းသူတချို့အပါ အ၀င် ဂျပန်လူမျိုးနှင့်လက်ထပ်ထားပြီး မြန်မာနိုင်ငံသားခံယူထားသူများ၊ စီးပွားရေးလုပ်ငန်းရှင်သမားများ ဖြစ်ကြပါတယ်။

ထောက်ခံမဲလာပေးဖို့ခေါ်ယူခြင်းခံရသဖြင့် လာရောက်မဲပေးကြရသော စာအုပ်အစိမ်းကိုင်ပညာတော်သင်များ

ဂျပန်နိုင်ငံမှာ ကျောင်းသားဗီဇာနှင့်နေထိုင်သူပေါင်း ၃,၀၀၀ ကျော်ရှိပေမယ့် အားလုံးကိုဆန္ဒမဲပေးဖို့ ဖိတ်ကြား ခြင်းမရှိပါဘူး။ အဲဒီအထဲကမှ ထောက်ခံမဲပေးမယ်လို့ ယုံကြည်စိတ်ချရသည်ဟု ယူဆထားကြသူများကိုသာ ခေါင်းခေါက်ရွေးချယ်ခဲ့ခြင်းဖြစ်ပါတယ်။

စီးပွားရေးလုပ်ငန်းရှင်သမားများကတော့ ကိုယ်ပိုင်ကားများနှင့်လာရောက်မဲပေးကြပြီး၊ မဲပေးရာတွင်လည်း ကန့် ကွက်မဲပေးလို့မရအောင် ဆန္ဒမဲပေးဖို့အမည်ဖြည့်စွက်သည့်အချိန်မှစ၍ မဲပုံးထဲသို့မဲထည့်သည့်အချိန်အထိ ဗွီဒီယိုကင်မရာများတပ်ဆင်ထားကာ နအဖသံမှူးနှင့်အဖွဲ့က ပေါ်ပေါ်တင်တင်ကြီးကြည့်ရှုတာခံရတယ်လို့လည်း ဖုန်းဆက်ခေါ်လို့ သွားရောက်မဲပေးခဲ့ရသူတဦးနှင့် ဆက်သွယ်မေးမြန်းချက်အရလည်း သိရှိရပါတယ်။

အ၀င်အ၀တံခါးပေါက်တွင် လုံခြုံရေးအတွက်ဟုဆိုကာ ဂျပန်ရဲများကိုစောင့်ထားခိုင်းပြီး၊ ထောက်ခံမဲပေးဖို့ ဖိတ်ခေါ်ထားခြင်းမရှိသည့် မြန်မာနိုင်ငံသားများကိုတော့ ၀င်ခွင့်မပြုဖို့ မှာကြားထားပါသေးတယ်။

မှတ်တမ်းဓါတ်ပုံ-မင်းညိုဝမ်း(မိုးသောက်ကြယ်)

Posted in: ဂျပန်လှုပ်ရှားမှုသတင်း(Japan Movement News)