ခြောင်းကြည့်သူရဲ့ အမှား(အမှတ်စဉ် ၄)

စစ်ဗိုလ်ချုပ်တွေ လုပ်သမျှ ပြစ်တင်ရှုတ်ချနေတဲ့ မြန်မာပြည်သားတွေကို ဒီတခါတော့ ကိုကြီးပေါ်က ကောင်းကောင်း ထောင်းပစ်လိုက်ချင်မိတော့တယ်။ မြန်မာဆိုတာ အဲသလိုပဲကွ, ရိုးရာဓလေ့ကို ထိန်းသိမ်းတယ် ဆိုတာ အဲသလိုကွလို့ ပြောပြောပြီးကို ထောင်းပစ်ချင်တာ။ ကြည့်လေ၊ ဗိုလ်ချုပ်မင်းတွေ လုပ်လိုက်ပုံက မြန်မာ့ဆိုရိုးစကားနဲ့ ဘယ်လောက် ညီလိုက်လေသလဲလို့။

သူခိုးပြေးမှ ထိုးကွင်းထ
ကြားဖူးတယ် မဟုတ်လား။ ဒီ ဆိုရိုးစကားလေးကို။ သူခိုးပြေးမှ ထိုးကွင်းထ တဲ့။
မေလ ၂ ရက်နဲ့ ၃ ရက်နေ့တွေမှာ နာဂစ်မုန်တိုင်း မြန်မာပြည်ကို ၀င်မွှေသွားတာ အခုအထိ မွှေလို့ကောင်းတုန်း။ အပျက်အစီး အဆုံးအရှုံးက ဒေါ်လာ ဆယ့်တစ်ဘီလီယံ ဖိုးလောက်ရှိသတဲ့။ ဒီ ကိန်းဂဏန်းက အကြားအမြင် ပေါက်ရောက်နေတော်မူသော ဗိုလ်ချုပ်မင်းများ ပြောတာပါ။ ခြေထောက်ပဲ ပေါက်တတ်တဲ့ နိုင်ငံတကာက ကျွမ်းကျင်သူတွေ ဘယ်တော့ ပြောမယ် မသိသေးပါဘူး။ သူတို့ ပြောတာကတော့ သေဆုံးသူ တစ်သိန်းတစ်သောင်းကျော်နဲ့ ဒုက္ခသည် နှစ်သန်းခွဲတဲ့။ ဗိုလ်ချုပ်မင်းများကတော့ သေဆုံးသူ ခုနှစ်သောင်းရှစ်ထောင်ပါတဲ့။ ထားပါတော့။ ကိုကြီးပေါ်က ကိုယ်တိုင် အလောင်းလိုက်ကောက်နိုင်သူ မဟုတ်တော့ မငြင်းချင်ပါဘူး။
ဒီလောက် ကြီးမားပြင်းထန်တဲ့ မုန်တိုင်းကြီး မြန်မာပြည်ကို ၀င်ရောက်မယ့်အကြောင်း ဗိုလ်ချုပ်မင်းများရဲ့ မုန်တိုင်းသတိပေးချက်က ဒီလိုရေးတယ်ခင်ဗျ။

ဘင်္ဂလားပင်လယ်အော် အလယ်ပိုင်းတွင် ဖြစ်ပေါ်နေသော အားကောင်းသော ဆိုင်ကလုန်း မုန်တိုင်းကြီးသည် ပုသိမ်မြို့၏ အနောက်တောင်ယွန်းယွန်း မိုင် ၄၈၀ ခန့်အကွာ ပင်လယ်ပြင်ကို ဗဟိုပြုနေသည်။ အဆိုပါ မုန်တိုင်းကြီးသည် လွန်ခဲ့သော ခြောက်နာရီအတွင်း ပိုမိုအားကောင်းလာခြင်း မရှိဘဲ အရှေ့မြောက်ယွန်းယွန်းသို့ တဖြည်းဖြည်း ရွေ့လျားလာခဲ့သည်။ အဆိုပါ မုန်တိုင်းကြီးသည် နောက် ၁၂ နာရီအတွင်း ပိုမိုအားကောင်းလာခြင်း မရှိဘဲ အရှေ့မြောက်စူးစူးသို့ ဆက်လက်၍ ဖြည်းညင်းစွာ ရွေ့လျားမည်ဟု ခန့်မှန်းရပါသည်။ မုန်တိုင်း၏ အရှိန်ကြောင့် ရခိုင်ပြည်နယ်, ကရင်ပြည်နယ်, မွန်ပြည်နယ်, ကယားပြည်နယ်, ဧရာဝတီတိုင်း, ရန်ကုန်တိုင်း, ပဲခူးတိုင်း တို့တွင် နေရာအနှံ့အပြား၊ တနင်္သာရီတိုင်းနှင့် ရှမ်းပြည်နယ်တို့တွင် နေရာကျဲကျဲမှ နေရာစိပ်စိပ် မိုးရွာမည်။ မြန်မာ့ကမ်းရိုးတန်းတလျှောက်နှင့် ကမ်းလွန်ပင်လယ်ပြင်တို့တွင် တခါတရံ မိုးသက်လေပြင်းများ ကျရောက်ပြီး လှိုင်းကြီးနိုင်သည်။ မိုးသက်လေပြင်ကျစဉ် ရေပြင်မြေပြင်လေသည် တစ်နာရီလျှင် မိုင် ၄၀ မှ ၄၅ မိုင်အထိ တိုက်ခတ်နိုင်ပါသည်။

ဒါက မေလ ၁ ရက်နေ့မှာ ရေးတဲ့သတင်းပါ။ သူ့အဆိုအရ အားကောင်းတဲ့ ဆိုင်ကလုန်းက အားကောင်းမလာဘဲ ဖြည်းဖြည်းလေး ရွေ့မယ် ဆိုပဲ။ ဒါပေမယ့် နောက်တနေ့ မေလ ၂ ရက်မှာတော့ သတင်းက ဒီလိုဖြစ်သွားပြန်တယ် ခင်ဗျ။
`ဆိုင်ကလုန်းမုန်တိုင်း အားကောင်းလာ နေရာကွက်ကျား မိုးထစ်ချုန်းရွာ၍ မိုးကြီးနိုင်´ တဲ့။ ဒါက သတင်းခေါင်းစဉ်ပါ။ ဆက်ရေးထားပုံက — လွန်ခဲ့သော ၁၂ နာရီအတွင်းက အဆိုပါ မုန်တိုင်းကြီးသည် ပိုမိုအားကောင်းလာကာ … ဆက်လက်အားကောင်းလျက် … မုန်တိုင်းဗဟိုချက်သည် ရခိုင်ပြည်နယ် တောင်ပိုင်းနှင့် ဧရာဝတီတိုင်း မြောက်ပိုင်းဒေသအတွင်းသို့ နောက် ၃၆ နာရီအတွင်း ဖြတ်ကျော် ၀င်ရောက်မည်ဟု ခန့်မှန်းရသည်။ ယင်းမုန်တိုင်း၏ အရှိန်ကြောင့် … မြန်မာ့ကမ်းရိုးတန်း တလျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်းများ ကျရောက်ပြီး လှိုင်းကြီးမည်။ မိုးသက်လေပြင်း ကျစဉ် ရေပြင်မြေပြင်လေသည် တစ်နာရီလျှင် မိုင် ၅၀ အထိ တိုက်ခတ်နိုင်သည်။ဒီသတင်းရဲ့ အထက်မှာ မိုးလေ၀သ ဖောင်ပိတ်သတင်းဆိုပြီး အင်တာနက်ကရတဲ့ သတင်းအဖြစ် ပစိဖိတ်ဒေသ မုန်တိုင်းသတိပေးဌာနရဲ့ သတိပေးချက်ကို ဖော်ပြထားပြန်ပါတယ်။ အဲဒီသတင်းမှာကျတော့ တစ်နာရီ မိုင် ၁၃၀ နှုန်း လေတိုက်နေတယ် ဆိုပဲ။ ဟုတ်ကဲ့၊ ၅၀ နဲ့ ၁၃၀ သိပ်မကွာပါဘူးနော်။

တကယ်တော့ ဒီခန့်မှန်းချက်ပါတဲ့ သတင်းစာ ရန်ကုန်က လက်ဖက်ရည်ဆိုင်တွေပေါ် ရောက်လောက်တဲ့ အချိန်မှာ နာဂစ်က ဟိုင်းကြီးကျွန်းကို ၀င်တိုက်နေပါပြီ။ သိပ်မကြာခင်မှာပဲ ရန်ကုန်မှာ မိုးတွေသွန်ချလာလို့ ရုံးတွေ စောဆင်းပေးလိုက်ပါတယ်။ ညမှာတော့ ရန်ကုန်ကလူတွေဆီ ဧရာဝတီတိုင်းက မုန်တိုင်းသတင်း ရောက်မလာသေးခင်မှာပဲ မုန်တိုင်း အစစ်က ရန်ကုန်ကို ရောက်လာခဲ့ပါပြီ။
အဲသည်နောက်တော့ မြန်မာပြည်ဟာ ကမ္ဘာပေါ်ကနေ အနားယူပြီး စကြ၀ဠာတနေရာမှာ ခေတ္တ သွားပုန်းနေပါတယ်။ တစ်ပတ် ဆယ်ရက်လောက်ရှိမှ ပြန်ရောက်လာပါတယ်။ ပြန်ရောက်လာတော့ ဧရာဝတီ အောက်ပိုင်းဒေသဟာ သုဿန်တစ ဖြစ်နေပါပြီ။
ဒီအခါကျမှ ဗိုလ်ချုပ်မင်းများရဲ့ မီဒီယာတွေက မိုးလေ၀သသတင်းကို ခရေစေ့တွင်းကျ ရေးပါတော့တယ်။ လေကလေးဝှေ့တာ, လှိုင်းကလေးအိတာ, မိုးဖွားကလေးကျတာကအစ တိမ်ကလေးတွေ ဘယ်လိုအရောင်နဲ့ ဘယ်လိုလွင့်နေမယ်ဆိုတာပါ ရေးပါတယ်။ ကဗျာရေးချင်သူတွေဆို အဲဒီ မိုးလေ၀သသတင်းဖတ်ပြီး ရေးလို့ရပြီ။ နတ်သျှင်နောင်လောက်တော့ ပျင်းတောင်ပျင်းသေး။ ကိုကြီးပေါ်တောင် လွမ်းချင်ချင်။

မယောင်ရာ ဆီလူး
ကျန်းမာရေးဌာနက ရေးပါသေးတယ်။ `သဘာဝဘေးအန္တရာယ် ကျရောက်သောဒေသများရှိ ပြည်သူများအတွက် ကျန်းမာရေး သတိပေးနှိုးဆော်ချက်´ တဲ့။ ၁၂ ချက် ရှိတယ်ခင်ဗျ။ ဘာတဲ့ —
အမိုးအကာအောက်မှာ နေတဲ့။ နွေးနွေးထွေးထွေး ၀တ်တဲ့။ ရေကို ကျိုသောက် ဒါမှမဟုတ်ရင် ကလိုရင်းခတ်သောက်တဲ့။ အစားအစာကို ယင်မနားစေနဲ့တဲ့။ သန့်ရှင်းလတ်ဆတ် ပူပူနွေးနွေး စားတဲ့။ ယင်လုံအိမ်သာ သုံးတဲ့။ အညစ်အကြေးနဲ့ အမှိုက်ကို စနစ်တကျ စွန်ပစ်တဲ့။ ထိခိုက်မှု မဖြစ်အောင် သတိပြုတဲ့။ မြွေအန္တရာယ်ကိုလည်း သတိပြုတဲ့။ ခြင်ကိုက် မခံရစေနဲ့တဲ့။ သန့်သန့်ရှင်းရှင်းနေတဲ့။ ကျန်းမာရေးပြဿနာ ဖြစ်ပွားရင် ကျန်းမာရေးဌာနကို အမြန်ပြတဲ့။အင်မတန် ကောင်းမွန် မှန်ကန်လှတဲ့ သတိပေးချက်တွေပေါ့ ခင်ဗျာ။ သို့ပေမဲ့ ကိုကြီးပေါ် တွေးမိတာ ဒီသတိပေးချက်တွေဟာ မုန်တိုင်းဒဏ်ခံရသူတွေ အတွက်တော့ ဟုတ်ဟန်မတူဘူး။ မြို့ပေါ်က စားနိုင်သောက်နိုင် ငွေရှင်ဓနရှင် ရာထူးရှင်အာဏာရှင်တွေအတွက် သတိပေးတာပဲ ဖြစ်ပါလိမ့်မယ်။ မုန်တိုင်းမိလို့ သစ်ပင်ငုတ်တုတ် တိုင်ငုတ်တုတ်ပဲရှိတော့တဲ့ နေရာကို ဒီသတိပေးချက်က ခြေထောက်ပေါက်ပြီး ရောက်လိမ့်မယ် မထင်ပါဘူး။ အကယ်၍ ရောက်လာရင်တော့ အီးကုန်းစရာမရှိတာနဲ့ အတော်ပဲဆိုပြီး အသုံးတော့ ၀င်နိုင်ပါတယ်။

ပြီးတော့ မုန်တိုင်းက လူတွေကိုတင် မကပါဘူး၊ မြွေရော ယင်ရော ခြင်ကိုရော အကုန်ရှင်းပစ်လိုက်တာပါ။ ဒီကောင်တွေ ရှိနေရင်တောင် လူတွေအဖို့ စားစရာတွေ့ပဟ ဆိုပြီး ရိုက်သတ်စားရမယ့် အခြေအနေပါ။ အဲသလို အစပ်အဟပ်တည့်တဲ့ သတိပေးချက်မျိုးကို ရေးတတ်တာ အလွန်ချီးကျူးစရာပါ။ ဒီလို သတိပေးချက်ရေးနိုင်ဖို့ မုန်တိုင်းကျပြီး နှစ်ပတ်လောက်ကို အချိန်ယူ ကြိုးစားထားရတာပါ။
အဲသလိုပေါ့လေ၊ သူခိုးပြေးမှ ထိုးကွင်းထ, မယောင်ရာ ဆီလူး, ခါးတောင်းကျိုက်တခြား ဖင်တခြား စတဲ့ မြန်မာ့ ဆိုရိုးစကားတွေနဲ့အညီ ဗိုလ်ချုပ်မင်းများ လုပ်ဆောင်လိုက်ပုံကတော့ ဟုတ်ပေ့ပါပဲဗျာ။

ကိုကြီးပေါ်က ဝေဖန်သူတွေကို ပြောလိုက်ချင်တယ်။ တွေ့လား နအဖက ကိုယ့်ရိုးရာ ကိုယ့်ဓလေ့ကို အဲသလို ထိန်းသိမ်းတာ။ မြန်မာ့ဆိုရိုးစကားနဲ့ အညီ လုပ်တဲ့နေရာမှာ နှစ်ယောက်မရှိ လုပ်တတ်တာလို့။ အရင်က ဆိုရိုးကတော့ ခါးတောင်းကျိုက်တလွဲ ဖင်တလွဲပေါ့။ ဗိုလ်ချုပ်မင်းတွေက ဘောင်းဘီဝတ်တာဆိုတော့ ဒါနဲ့လိုက်အောင် ဒီလိုပြင်လိုက်ရအောင်။ `ဘောင်းဘီခေါင်းလောင်း ခွဟောင်းလောင်း´ လို့။
ကဲ… ကိုကြီးပေါ်တော့ဖြင့် ခြောင်းကြည့်မိတိုင်း မှားနေမိတော့တာပဲနော်။

ကိုကြီးပေါ်

Posted in: